Til að fullkomna heimsókn að Jökulsárlóni á Breiðamerkursandi er upplagt að fara í siglingu um lónið.

Ef þig vantar minjagripi eða gjafir, er hægt að fara í Víkurprjón í Vík.  Þar er hægt að fá ullarvörur og breitt úrval minjagripa.  Leirbrot og gler í Vík notar endurunnið gler í sína muni.

Fyrir fuglaskoðara er gaman að eyða tíma við ströndina, einnig á mýrunum við Dyrhólaós og víðar.

Í kjölfar gossins í Eyjafjallajökli árið 2010, hefur verið sett upp sýning á Þorvaldseyri undir Eyjafjöllum um gosið og áhrif þess á byggðina.

Í Fagradal austan Víkur, er bleikjueldi sem hægt er að skoða. Þar má einnig kaupa í leiðinni reykta bleikju eða lax.

Í Skógum er Byggðasafn sem enginn má láta framhjá sér fara. Þar hefur farið fram mikil uppbygging, byggð á söfnun Þórðar Tómassonar á gömlum munum.  Í Brydebúð í Vík er vísir að ágætis safni og söfnin í Vestmannaeyjum eru einnig athyglisverð ef þangað er farið.

Jöklagöngur á Sólheimajökul eru orðnar mjög vinsælar.  Slíka göngu verður að fara með leiðsögumanni, enda jökullinn sprunginn og nauðsynlegt að hafa réttan búnað og leiðsögn.

Víða er möguleiki á að komast á hestbak.  Það er þó árstíðabundið hvaða leigur eru í rekstri.

Á Mýrdalsjökli er boðið upp á snjósleðaferðir. Við góðar aðstæður er stórbrotið útsýni af jöklinum.

Frá hótelinu eru margar áhugaverðar gönguleiðir.  Við höfum kort af nokkrum leiðum fyrir okkar gesti.